Epitaphe et fondations de Claude Alays (+ 1er septembre 1557)

Fonction : commémorative.
Epitaphe en lettres de forme gothiques ; pierre de forme légèrement bombée pour s'adapter à un pilier (selon Guilhermy).

Les marguilliers de la fabricque de ceans sont tenuz faire dire a tousiours es jours de lundy, mardy, merqcredy, jeudy, vendredy, et sabmedy en la chappelle de la conception Nostre Dame à l'heure de unze heures pour deffunct venerable et discrette personne maistre Claude Alays en son vivant prebstre et clerc de ladicte fabricque, une messe basse de la sollempnité du jour avec memoire des trespassez, asperger sur la sepulture avant que chanter chacune messe, sonner les deulx petittes cloches de ladicte eglise et tinter l'une des grosses unze coups. Item sont aussy tenuz faire dire ung salut sollempnel par chacun jour de vigille de l'Anonciation Nostre Dame dedans le cueur a sept heures en la maniere accoustumee et en la fin Te Deum a orgues. Aussy dire Ne recorderis, de profundis et oraisons accoustumez, sonner et tinter la plus grosse cloche ung quart d'heure. Item faire dire cinq obiictz par an assçavoir quattre aux quattre temps de l'annee et le cinquieme le premier jour de septembre, auquel jour ledit Alays est decedé. Item, les maistres de la chappelle de ladite conception en ladite eglise sont tenuz faire dire chacun dimenche a tousiours en ladite chappelle une basse messe du jour après la haulte messe ordinaire et en la fin De profundis et les oraisons susdites sur ladite sepulture. Item les abbé, doyen, prevost, maistres et gouverneurs de la confrairie Nostre Dame aux bourgeoys de Paris sont tenuz faire dire et celebrer a tousiourz en ladite eglise Saint-Gervais le quatrieme febvrier ung obiit, vigilles a neuf pseaulmes et neuf leçons, la prose Inviolata, une messe du Sainct-Esprit et une aultre messe de Nostre Dame et la troysiesme haulte des trespassez avec Libera et les oraisons sur ladite sepulture, et ce faict, bailler a ladite fabricque vingt deniers tournoys a chacun obiit, comme plus aplain appert par lettres de ce faictes et pour les causes y contenues, le tout pour le remede de son ame. Requiescat in pace. MVLVII.