Inscription commémorative de fondations faites par Augustin Ysbarre (mort en août 1425)

Fonction : commémorative.
Inscription en lettres gothiques. Bordure ornée d'un rinceau courant, d'anneaux entrelacés, de trois A couronnés et de deux écus palés d'azur et d'argent de six pièces, au chevron d'or brochant sur le tout.

Le prieur et couvent de ceste eglise sont tenuz et obligez de dire et celebrer par chacun jour de l'an perpetuellement a cest autel cy devant une messe, c'est assavoir le jour de dimanche de la benoitte trinité, le lundi de Monseigneur saint Augustin, le mardi des angeles, le mercredi pour remission de noz pechés dont la messe commance misereris omnium Domine, le jeudi du saint Esperit, le vendredi de la croix et le samedi de Nostre Dame. Et cy doivent querir et livrer luminayre, vestemens et touttes autres choses necessayres ; et oultre sont tenuz de chanter chacun an perpetuellement un obbit c'est assavoir vigiles de mors a IX pseaulmes et IX leçons ; lendemain de la Saint Augustin et le jour aprés ensuivant une haulte messe a notte solempnellement chantee au grant autel a diacre soubdiacre et acolites, auquel obbit doivent luire VIII cierges ardans, lesquelles chosez a fondé noble homme Augustin Ysbarre, qui a ordonné que aprez son trespassement touttes lesdites messes soient changees en messe de requien excepté celles du dimanche et les festes solempneles ; et aprés chacune d'icellez messes, celuy qui l'aura chantee est tenu de dire sur cette sepulture ung De profundis aveq les versés et collettes adce appartenans, en donnant sur icelle de l'eaue benoitte. Sy comme touttes ces choses peuvent plus aplain aparoir par lettres passees et scelleez par lesdiz prieur et couvent, l'an mil CCCC XXIIII ou moiz de novembre.