Epitaphe de Viriot Copperet (+ 1601)

Fonction : commémorative.

De noble Viriot Copperet, quand il vivoit seigneur des Thuris lez la ville de Metz et citoyen d'icelle qui trespassa en ceste ville de Paris le XXVIIIe septembre MDCI.
Entre la naissance et la mort, l'interval est ordinairement entrecoupé de quelques adversitez : telle est l'humaine condition. Ecoute passant : Metz ville celebre me donna la vie, doulx nee fut son cours, heureus en mariage de cincquante cinq ans et plus, favorable en lignée, honnorable pour les charges qu'il m'y a veu exercer, souvent de judicature, deux fois maistre eschevin, magistrat premier en dignité ; trop heureux mes jours passez en la foy de mes peres, si les derniers n'eussent esté persecutez de calomnie, elle prevalut sur mon innocence, faulcement accusé avec mon propre filz et autres gens de bien des premiers de ladicte ville, je suis arresté, de la citadelle d'icelle amené en ceste ville, poursuivi, et finablement recognu innocent, elargi. Mais Dieu me voulant du tout affranchir de miseres, en mesmes temps qu'il tire mon corps de la captivité, il a retiré mon esprit de sa prison corporelle, m'appellant a soy dix jours aprés mon eslargissement. Pries Dieu pour moy passant, et qu'il te garde de faulse accusation.