Epitaphe et fondations de Jean Edeline (+ 1568)

Fonction : commémorative.
"Plaque de forme légèrement bombée - devait s'adapter à une colonne -. Un double filet en creux sert d'encadrement. Le texte laisse sur le côté droit un espace vide où se trouve dessinée l'effigie du prêtre Jean Edeline à genoux, les mains jointes, vêtu d'une longue soutane et par-dessus d'une aube courte ou surplis (Guilhermy).

Les maistres et gouverneurs de la confrarie du Saint Sacrement de l'autel fondée en ceste église de Saint-Estienne sont tenuz et obligez à toujours de faire dire, chanter et célébrer en la chappelle du nom de Jhésus qui est derrière le grand autel de ladite église chacun premier jeudy de chacun moys de l'an une basse messe des trespassez pour deffunct, vénérable et discrette personne maistre Jehan Edeline, en son vivant prebstre, clerc de l'oeuvre et fabricque d'icelle église qui gist cy-devant ce pillier et après ladite messe la Passion et le pseaulme De profundis et oraisons pertinentes sur la sépulture dudict deffunct, le tout incontinent après la messe de la fondation de feu Monseigneur Le Bel abbé de Saincte-Geneviève. Et paieront lesdicts maistres et gouverneurs ou leurs commis pour chacune messe de ladicte fondation trois solz quatre deniers tournois et au clerc de ladite oeuvre et fabricque pour livrer pain, vin, libvre, calice et ornemens de trespassez pour dire ladicte messe XV sous tournois par chacun an. Et ce moyennant certaine somme de deniers que ledit deffunct a donnez à ladite confrarie par son testament pour iceulx estre employez en rente par les maistres et gouverneurs d'icelle, comme il appert par les lettres de délivrance à eulx faicte et passeez par devant Fardeau et Périer, notaires ou Châtelet de Paris le samedy XIe jour de décembre, l'an mil cinq cens soixante huict. Pater noster. Ave Maria.